| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 43.73 | Dem. 43.75 (English) | >>Dem. 43.77 |
43.74ἐγὼ δὲ ἐπειδὴ ἐπεδικασάμην τῆς τούτου μητρὸς καὶ ἐγένοντό μοι υἱεῖς μὲν τέτταρες , θυγάτηρ δὲ μία , τὰ ὀνόματα ἐθέμην τούτοις , ὦ ἄνδρες δικασταί , τῷ μὲν πρεσβυτάτῳ τὸ τοῦ πατρὸς τοῦ ἐμαυτοῦ ὄνομα , Σωσίαν , ὥσπερ καὶ δίκαιόν ἐστιν , καὶ ἀπέδωκα τῷ πρεσβυτάτῳ τοῦτο τὸ ὄνομα · τῷ δὲ μετʼ αὐτὸν γενομένῳ τούτῳ ἐθέμην Εὐβουλίδην , ὅπερ ἦν ὄνομα τῷ πατρὶ τῷ τῆς μητρὸς τοῦ παιδὸς τουτουί · τῷ δὲ μετὰ τοῦτον Μενεσθέα ἐθέμην (καὶ γὰρ ὁ Μενεσθεὺς οἰκεῖος ἦν τῆς ἐμῆς γυναικός )· τῷ δὲ νεωτάτῳ ἐθέμην ὄνομα Καλλίστρατον , ὃ ἦν ὄνομα τῷ πατρὶ τῆς ἐμῆς μητρός . ἔτι δὲ πρὸς τούτοις καὶ τὴν θυγατέρα ἔδωκα οὐδαμόσε ἔξω , ἀλλὰ τῷ ἀδελφιδῷ τῷ ἐμαυτοῦ , ὅπως , ἐὰν ὑγιαίνωσιν , καὶ οἱ ἐκ τούτων ἐκ τοῦ αὐτοῦ γένους ὦσιν Ἁγνίᾳ .
43.75ἐγὼ μὲν οὖν τοῦτον τὸν τρόπον διῴκησα , ὅπως ἂν διασῴζωνται ὅτι μάλιστα οἱ οἶκοι οἱ ἀπὸ τοῦ Βουσέλου · τούτους δὲ ἐξετάσωμεν πάλιν . καὶ πρώτιστον μὲν τὸν νόμον τουτονὶ ἀνάγνωθι .
Νόμος
ὁ ἄρχων ἐπιμελείσθω τῶν ὀρφανῶν καὶ τῶν ἐπικλήρων καὶ τῶν οἴκων τῶν ἐξερημουμένων καὶ τῶν γυναικῶν ,ὅσαι μένουσιν ἐν τοῖς οἴκοις τῶν ἀνδρῶν τῶν τεθνηκότων φάσκουσαι κυεῖν .τούτων ἐπιμελείσθω καὶ μὴ ἐάτω ὑβρίζειν μηδένα περὶ τούτους .ἐὰν δέ τις ὑβρίζῃ ἢ ποιῇ τι παράνομον ,κύριος ἔστω ἐπιβάλλειν κατὰ τὸ τέλος .ἐὰν δὲ μείζονος ζημίας δοκῇ ἄξιος εἶναι ,προσκαλεσάμενος πρόπεμπτα καὶ τίμημα ἐπιγραψάμενος ,ὅ τι ἂν δοκῇ αὐτῷ ,εἰσαγέτω εἰς τὴν ἡλιαίαν .ἐὰν δʼ ἁλῷ ,τιμάτω ἡ ἡλιαία περὶ τοῦ ἁλόντος ,ὅ τι χρὴ αὐτὸν παθεῖν ἢ ἀποτεῖσαι .
| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 43.73 | Dem. 43.75 (English) | >>Dem. 43.77 |
